90 percent inclined nga magapapili bilang Congressman sa ciudad sang Bacolod si Mayor Alfredo “Albee” Benitez para sa 2025 Midterm Elections.
Sa interview sang Bombo Radyo Bacolod Barangay Singcang Airport Punong Barangay Atty. Caesar Distrito, spokesperson sang alkalde, bangud yara sa Turin, Italy ang alkalde kaupod sang pila ka opisyales agud ipromote ang Slow Food Festival, ini ang iya na lamang gintawgan.
Suno kay Distrito, ginpamangkot sini si Mayor Albee kun ano ang padalaganan sini bangud subong nga adlaw Oktubre 1, magaumpisa na ang filing sang mga aspirants sang ila Certificate of Candidacy sa Commission on Elections (COMELEC).
Nagsabat ang alkalde nga siya ang 90 percent inclined nga magpapili bilang Representative sang Bacolod City Lone District.
Ginpahayag man ni Distrito nga kun yara sa kongreso si Benitez, mas makabulig ini sang dako agud nga mangin mas masanyog ang ciudad sang Bacolod.
Samtang, nagapati naman si Distrito nga may naestoryahan na ang alkalde kag si Congressman Greg Gasataya, tuhoy sa pwesto nga ila padalaganan.
Samtang, ginpahayag ni Bacolod City Lone District Congressman Greg Gasataya nga ang desisyon para sa padalaganan nga government position sa 2025 midterm elections ang iga-anunsyar man sini sa husto nga tion.
Suno kay Gasataya, nag-umpisa na ang filing of COC subong nga adlaw, Oktubre 1, 2024 kag indi matapos ang COC filing sa Oktubre 8, mahibaluan na ang desisyon sang Team Asenso.
Pasalig sini nga magapadayon gihapon ang ‘serbisyo nga may puso’ ara sa mga Bacolodnon.
Ang Team Asenso ang ginapahayag nga magfile sang ila nga COC sa Oktubre 8.
