Nagpanawagan ang alkalde sa ciudad sang Bacolod nga indi magpalapta sang fake news.
Ini ang kasunod sang madasig nga paglapta sang mga social media posts natuhoy sa maroon kag itom nga van nga nagapanguha sang mga pamatan-on.
Sa interview sang Bombo Radyo Bacolod kay Atty Caesar Distrito, Punong Barangay sang Barangay Singcang-Airport kag spokesperson ni Bacolod City Mayor Alfredo ‘Albee’ Benitez, isa pa sa gingamit nga litrato sa fake news ang itom nga van sang Bacolod City Government.
Sa post, ginapaalarma ang mga pumuluyo bangod ginagamit ang ‘Libre Sakay’ nga pangalan agud makapang-abduct.
Apang paathag ni Distrito nga matuod nga ginagamit sa Libre Sakay ang van agud mabuligan ang mga stranded nga pasahero tuga sang ginpatigayon nga duha ka adlaw nga tansport strike.
Suno kay Distrito, naga-apelar gid ang alkalde nga untatan na ang pagpalapta sang mga alegasyon sang kidnapping kun wala man sang kamatuoran.
Sa baylo ini ang nagatuga sang panic kag tuman ang pagkabalaka sang mga ginikanan.
Aminado ini nga wala sang malain nga mangin mahinalungon, apang kun may kaangay gid man nga mga hitabo ini ang dapat nga ireport sa eskwelahan, ginikanan kag kapulisan.
Suno diri, may mandato si Benitez sa mga hepe sang kapulisan nga mangin agresibo sa police visibility.
Panawagan man sini sa mga ginikanan nga imonitor ang mga kabataan ilabi na sa oras sang ila nga pagpauli.
Isa man sa mandato sang alkalde ang hugot nga pagpatuman sang curfew for minors.
