Mas ginpili ni Bacolod City Mayor Alfredo ‘Albee’ Benitez ang magserbisyo sa mga Bacolodnon apisar nga ini ang gintanyagan na sadto nga mangin kabahin sang gabinete sang Marcos Administration.
Sa interview sang Bombo Radyo Bacolod kay Barangay Singcang-Airport Punong Barangay Atty. Caesar Distrito, indi na lipod sa ihibalo sang kadam-an ang malapit kag madugay na nga relasyon sang alkalde kag ni President Ferdinand ‘Bongbong’ Marcos Jr.
Suno kay Distrito, bilang anay kongresista kag nagaserbe nga Chairperson sang League of Cities of the Philippines kag nagpungko nga pinuno sang Regional Development Council (RDC)-6, si Benitez ang kwalipikado gid sa cabinet position.
Apang ang commitment sadto sang alkalde ang nakatutok sa kaayuhon sang Bacolod City.
Sa karun nagapabilin ang focus sini sa pagserbisyo sa ciudad samtang yara sa pwesto, ilabi na nga malayo paman ang 2025 Midterm Elections.
Paathag ni Distrito nga sa karun wala pa sang political lineup ang Team Asenso.
Apang nagapabilin nga lima ang options ni Benites, nga ginalakipan sang re-election bilang alkalde, magswitch bilang kongresista kay Congressman Greg Gasataya, batunon ang national position kaangay sang posibilidad bilang tiglikom sang Department of the Interior and Local Government (DILG), magpapili bilang Senador, ukon magpahuway sa politika.
Gin-athag man ni Distrito nga sa Team Asenso, si Benitez ang magadesisyon kun sin-o ang mapapili sa top 3 local positions nga ginalakipan sang alkalde, bise alkalde kag congressman, matapos ang konsultasyon sa mga miyembro.
Sa bahin naman sang mga konsehal, sila ang may duha pa ka bakante nga pwesto, apang nagdangat sa 10 tubtob 12 ang nagpabutyag nga luyag mag-upod sa linyada.
Suno kay Distrito, ginalantaw nga itrim-down sa anom ang pilian kag magapatigayon sang convention sa tagsa ka mga Barangay.
