Ginklaro ni Bacolod City Mayor Alfredo “Albee” Benitez, nga ayuhay sila ni Congressman Greg Gasataya.
Sa pahayag sang alkalde, nagtambong sa ginpatigayon nila nga launching sang Asenso local party si Gasataya kag ini ang kaupod pa nila sa dinner antes ang speech sang alkalde sang Sabado, Desyembre 16.
Dugang pa sini nga matapos sang iya nga speech may ara pa sila sang iban nga mga ginbuhat nga aktibidad.
Paathag ni Benitez nga ang programa ang ginakabig nga Unity Event kun sa diin welcome ang tanan nga magtambong, bangod ang tinutuyo nila amo ang mahugpong ang tanan.
Nagapati ang alkalde nga halos tanan nga public official ang may palarehas nga tinutuyo kag dereksyon, ang kaayuhan sang ciudad.
Gani kun makita nga ang ila mga aktibidad ang para sa pumuluyo, sarang ang mga ini nga makaupod sa ila apisar gikan pa sa lain nga partido.
Paathag ni Benitez ini ang labing una nga kahigayunan kun sa diin siya mismo ang nagbuhat sang reconciliation approach partikular na sa mga nagikan sa Grupo Progreso.
Aminado naman ang alkalde nga ini ang indi madalidali, apang ang dapat nga focus suno diri amo ang kaayuhan sang publiko, bangod ini ang magaserbe nga unifying factor samtang dapat naman nga madula ang political color.
Pasalig sini nga siya ang indi magadesisyon bangod sa political favor ukon political loyalty, kundi ang desisyon sini ang magabase sa kun ano ang makamaayo sa mga Bacolodnon.
Paathag ni Benitez nga normal lamang ang konflikto sa kabuhi sang tawo, apang dapat lantawon ang mga pamaagi agud ma-address ang konflikto.
