Nagalaom ang alkalde sa ciudad sang Bacolod kay magagikan sa Visayas ang masunod nga mangin tiglikom sa Department of Education (DepEd)
Madumduman nga una na nga nakapagwa sang statement si Bacolod City Mayor Alfredo ‘Albee’ Benitez, nga nagapanawagan kay Vice President Sara Duterte nga magresign.
Apang wala matumod kun ang panawagan sa pagresign ang bilang Bise Presidente ukon bilang DepEd Secretary.
Sa interview sa alkalde, ini ang iya nangin suhistyon bangod sa nakita nga nagakatabo sa gabinete kag ang pagpanaog ni Duterte bilang Education Secretary ang makabig sini nga maayo nga desisyon.
Paathag sini nga plastado naman ang opening sang klase, apang balantayan na lamang kun may-ara sang mga pagbag-o.
Apang ang kwestyon na lamang sa karun kun sin-o ang mangin masunod nga DepEd Secretary.
Suno kay Benitez, siya ang nagalaom nga gikan sa Western Visayas ukon bisan diin man sa Visayas ang masunod nga tiglikom sa sektor sang edukasyon, agud mas mahapos mabatian ang mga concerns sa education sector sa Bacolod City kag Negros Occidental.
Nahibaluan nga may mga nagagwa na nga mga espekulasyon nga gikan sa Negros Occidental ang masunod nga DepEd Secretary.
