Pahanumdom sang alkalde sa ciudad sang Bacolod kadungan sa Philippine National Flag Day amo ang pagpamalandong sa matuod nga simbolo sa hayahay sa tion nga kita ang nagatambong sang flag ceremony.
Ginpangunahan ni Bacolod City Mayor Alfredo “Albee” Benitez ang 2024 Philippine National Flag Day celebration nga ginpatigayon sa Rizal Elementary School nga nag-umpisa alas-7:30 kaina sang aga.
Sa mensahe sang alkalde, gindumdom sini ang nakaandan na nga pagpatigayon sang flag ceremony sa mga eskwelahan kag ahensya sang gobyerno kada Lunes sang aga.
Apang kadungan sini, dapat man nga pamalandungan ang mga yara sa likod sang hayahay.
Ini ang mga baganihan nga naghalad sang kabuhi para sa kahilwayan sang pungsod.
Pahayag sang alkalde nga dapat magsulod sa pinsar sang mga Pilipino sa tion nga nagahatag pagtahod sa hayahay sang Pilipinas, ang kun ano ang ila nga panindugan kun mag abot ang tion nga sila naman ang tawgon sa pagsakripisyo sa pungsod.
Pila sa mga nakasabat sa nasambitan nga pamangkot amo ang mga kapulisan kag mga suldado nga adlaw-adlaw nagarisgo sang ila kaluwasan agud maproteksyonan ang pungsod.
Kasubong man ang mga public servant nga ginahatag na ang ila kabuhi para mahatag ang kaayuhan sang komunidad.
Panugyan sang alkalde sa mga kabataan, nga dapat dumdumon man sang mga ini kun ano ang ginasimbolo sang hayahay.
Panindugan ni Benitez nga ang pagtambong sa flag ceremony ang indi lamang buhaton bangod nakaandan na, kundi agud mahatagan sang dako nga pagkilala hayahay nga nagasimbolo sang kahilwayan sang Pilipinas.
