Naghatag sang derektiba si Bacolod City Mayor Alfredo “Albee” Benitez sa IPM Construction and Development Corporation kag Bacolod City Environment and Natural Resources Office (BENRO) nga wala dapat sang makita nga nagalapta nga basura sa ciudad sang Bacolod.
Suno diri, ang IMP ang responsable sa paghakot sang dalagko nga volume sang basura kag dal-on sa landfill area.
Samtang may-ara naman sang mga 3-Wheeled Motorized Waste Collection Units sa mga Barangay nga amo ang magahakot sang mga basura gikan sa mga makitid nga eskinita kag mga suludlon nga Barangay agud dal-on sa italana nga collection point ukon magaserbe nga transloading area.
Suno sa alkalde, inkaso nga indi makahakot ang garbage truck, kun may ara sang garbage bin, indi magalapta ang mga basura.
Ginarekomendar man ni Benitez ang pagbutang sang signages kun sa diin makita ang schedule sang garbage collection kalakip na ang lugar, oras kag adlaw sang paglabay sang mga garbage trucks.
Ginmando man sini ang pagplastar sang mga garbage bin sa palibot sang ciudad nga mahabuyan sang mga pumuluyo.
Pinaagi sini wala na sang may irason ang mga nagahaboy sang basura sa indi nagakaigo nga lugar lun sila ang dakpon ukon sitaon.
Aminado ini nga mabudlay ang enforcement sa paghatag penalidad sa nagahaboy sang basura sa kun diin-diin bangod marason lamang sang mga ini nga sila ang wala sang mahabuyan bangod wala sang basurahan.
Nagpagwa naman ang IPM sang updated nga schedule sang collection kun sa diin may daily collection sa mainroads sang Barangay 1 tubtob 4.
Lunes kag Huwebes naman sa Banago, Bata, Granada, Villamonte, Mandalagan, Alangilan kag Montevista.
Martes kag Biyernes naman sa Estefania, Taculing kag Mansilingan; kag Miyerkules kag Sabado sa Singcang-Airport, Tangub, Alijis, Pahanocoy, Punta Taytay, Sum-ag, Cabug, Vista Alegre, Handumanan kag Felisa.
Kun may concerns ukon reklamo, mahimo man nga makacontact sa ila updated contact numbers, IPM – 09773651828 kag BENRO – 09695944635.
