Nagpasalig sang alkalde sang ciudad sang Bacolod nga mapatuman ang underground cabling sa dalan Lacson antes mag-abot ang bulan sang Mayo sa masunod nga tuig.
Kahapon, liwat nga gin-activate ang Task Force Spaghetti Wires sa ciudad.
Ini ang ginpangunahan ni Bacolod City Councilor Pao Sy, chairperson sang committee on public works sa Sangguniang Panlungsod kaupod ang lima ka telecommunication companies, City Engineer’s Office, Bacolod Traffic Authority Office, kag Bacolod City Police Office.
Madumduman nga nag-umpisa ang task force sang Agosto 14, 2022 tubtob sa Marso 18, 2023 kun sa diin nagdangat sa 38,116.58 kilos ang nakuha nga mga spaghetti wires.
Suno kay Bacolod City Mayor Alfredo ‘Albee’ Benitez, bisan nga dako na nga kilo sang kable ang nakuha sang task force, makit-an sa gihapon sa dalanon ang mga spaghetti wires.
Suno diri, mabudlay kag dako ang maggasto sa pagpatuman sang underground cabling apang dako man ang mangin benepisyo sini.
Dugang pa sini, sa karun mas athag kag may direksyon na ang ciudad para sa ini nga proyekto kag ini ang makita sang tawo nga napatuman.
