Plano ni Bacolod City Mayor Alfredo ‘Albee’ Benitez nga magpatigayon sang transport summit agud ma-estoryahan kag masolusyunan ang mga concerns kag problema sa transport sector sa ciudad.
Sa statement sang alkalde, aminado ini nga madamo sang mga nabudlayan sa mga derektiba kag polisa nga ginapatuman sang gobyerno partikular na sa Public Utility Vehicle (PUV) Modernization Program.
Nahangpan man sini nga kun ang mga pagpatuman ang may dako nga epekto sa pumuluyo, madamo sang indi willing nga magsunod.
Bangod sini, ginabalanse sang City Government kag ginatinguhaan nga makakita sang win-win solution ang mga problema sa sektor sang transportasyon.
Suno sa alkalde ang nakita nila nga masami problema sa modernized jeepneys amo ang inter-corporate conflict.
Sa transport summit sila ang magahatag sang intervention ukon magapatunga agud masolbar ang issues ukon mga concerns.
Ini bangod nakita na sang alkalde nga kun maglala pa ang mga away, ang maperwisyo amo ang riding public kag sa ulihi ini ang igabasol man gihapon sa Bacolod City Government.
