Wala nagakahangawa si Bacolod City Mayor Alfredo “Albee” Benitez apisar sa pahayag sang pila ka mga traditional Jeepney drivers nga sila ang magapatigayon sang transport strike sa Desyembre 13.
Nahibaluan nga hugot nga ginapamatukan sang Bacolod Alliance of Commuters, Operators and Drivers (BACOD) ang gintalana sang Land Transportation Franchising and Regulatory Board (LTFRB) nga deadline para sa consolidation sang mga traditional jeepneys sa Desyembre 31, 2023.
Kasunod sini, sa Enero 1, 2014, phase out na ang mga traditional jeepneys nga indi mag-upod sa modernization program.
Magluwas sa BACOD, magabuylog man sa transport strike ang United Negros Drivers and Operators Center (UNDOC) kag Kilosang Mayo Uno.
Sa interview sang Bombo Radyo Bacolod kay Benitez, sa ila ulihi nga diskusyon nakita sini nga indi mismo ang modernization program ang ginareklamo sang mga transport group kundi ang proseso, guidelines kag mga polisa.
Nagapati ang alkalde nga kinahanglan lamang nga ini ang mapungkuan kag ma-estoryahan ang ila kinaiya.
Suno kay Benitez, wala ini nagakahangawa bangod wala man ini sang nabatun nga notice sa kadamuon sang mga maga-upod sa transport strike.
Ini bangod positibo ang alkalde nga magluwas sa masobra 600 nga mga nagabyahe nga modernized jeepneys, madamo man sang traditional jeepneys nga naga-ugyon na sa modernization program.
Kalakip sa ginaduso ni Benitez may kaangtanan sa modernization program ang paggamit sang electronic jeepneys.
Nakita man sang mga ini nga dako ang benepisyo sa pag-operar sang e-jeepneys bangod mas makasave ang mga ini sa electric jeepneys nga nagagamit sang kuryente sangsa paggamit sang fuel.
Sa pihak nga bahin agud maaddress ang transport strike, nagapakig-angot naman ini sa mga Business Process Outsourcing (BPO) Companies kun mahimo nga ma-augment ang ila mga service vehicles inkaso nga madamo sang mastranded nga pasahero bangod sa transport strike.
