Dismayado si Bacolod City Mayor Alfredo Albee Benitez sa sunod-sunod nga kontrobersiya sa Bacolod Traffic Authority Office.
Nahibaluan nga nagsabat na si BTAO head Patrick Leonard Lacson angot sa ginpagwa sini nga memo nga nagamando sa mga traffic enforcers nga dapat may yara sang indi magnubo sa lima ka apprehensions ang mga enforcers kada adlaw ukon sila ang kakson sa trabaho, kasubong man nga nagpadala na ini sang letter of apology angot sa Mayor Albee Benitez cab (MAB-cab) nga ginkakasan sini sang sticker kag gingamit bilang service vehicle niya bilang pinuno sang BTAO.
Suno kay Lacson ang paggamit sini sang MAB-cab ang para kun tani sa pagtsekyar sa mga traffic enforcers kun bala nagatrabaho sang insakto ang personnel.
Dugang pa sini, ang first world countries may yara man sang ginapatuman nga quota, apang ini ang pagatsekyaron pa sang ciudad kun matuod.
Suno kay Bacolod City Mayor Alfredo Albee Benitez, pagapamatian sini ang sabat ni Lacson antes ini magpagwa sang desisyon.
Sa bahin naman sang isyu sa MAB-cab, suno sa alkalde pamatian sini ang sabat sang BTAO head bangod nga ang pagkakita sang MAB-cab sa gwa sang iya balay kag pagkakas sang sticker sini ang makahatag sang lain nga pag-intindi sa iban.
Paga-reviewhon man sini ang sabat ni Lacson angot sa memo nga ginpagwa sang BTAO, bangod nga ini ang unfair indi lamang para sa mga traffic enforcers apang kasubong man sa mga motorista.
Posible nga bisan indi sigurado ang enforcer sa bayolasyon sang motorista, ang matabo diri amo nga dakpon na lamang sini ang motorista para malab-ot ang quota kag indi makakas sa trabaho.
