Gin-athag sang spokesperson ni Bacolod City Mayor Alfredo “Albee” Benitez nga wala nakahambal ang alkalde kun ano gid ang position nga padalaganan sini sa 2025 midterm election.
Suno kay Atty. Caesar Distrito, wala pa nakahatag sang political plan ang alkalde apang may yara ini sang lima ka options kag pila diri ang pagpare-elect bilang alkalde, ang pagpabayluhanay nila ni Congressman Greg Gasataya kun sa diin si Benitez ang magpapili Congressman samtang si Gasataya ang magpapili alkalde, mapadalagan senador, magkuha sang cabinet position bangud close sila sang presidente ukon pilion ang pribado nga pagpangabuhi.
Suno kay Distrito, wala ginadula sang alkalde ang pagpare-elect bangud siya ang incumbent kag ginakonsiderar sang alkalde sa pagdesisyon amo ang kun sa ano kag sa diin ini ang mas makabulig para sa kamaayuhan sang mga pumuluyo kag ciudad sang Bacolod.
Ginahatag naman sang alkalde kay Bacolod City Lone District Congressman ang desisyon sa kun sin-o ang ipadalaganon sini sa bilang congressman sang ciudad.
Samtang, gin-athag man ni Distrito nga ang pag-abyanay sang alkalde kag sang kongresista ang nagapabilin nga mapag-on.
Sa karun nga malayo pa ang election, luyag lamang sang alkalde nga magtrabaho kag matutukan ang mga trabaho nga kinahanglan tapuson kasubong man mahatagan sang mga solusyon ang ginapangatubang sang ciudad.
