Gin-aprubahan na sang Sangguniang Panlungsod sa syudad sang Bacolod ang ginpropose nga Memorandum of Agreement (MOA) ni Bacolod City Councilor Al Victor Espino, ang chairperson sang Committee on Laws and Ordinances sa City Council.
Sa interview sang Bombo Radyo Bacolod kay Espino, ginhatag na sang SP ang otoridad kay Bacolod City Mayor Alfredo “Albee” Benitez sa pagpirma sa MOA sa tunga sang Bacolod City Government kag Bacolod Yuhom Foundation.
Sa MOA, ang Bacolod Yuhom Foundation ang magaserbe nga main organizer sa Masskara Festival 2023.
Nakapagkit man sa kasugtanan nga ang Bacolod Yuhom Foundation sa pagpanguna ni Katie Matiling amo ang magahandle sa tanan nga event sa Masskara Festival 2023 kag sila man ang magatipon sang pondo nga gamitun.
Gin-athag ni Espino nga may-ara kuntani sang obligasyon ang Bacolod Yuhom Foundation sa Masskara Festival 2022 sa pagpanguna ni Atty Pinky Mirano nga magreport sa Sangguniang Panlungsod bangod wala naaprubahan ang MOA kun wala sang pahanugot nila.
Suno diri, wala na nila ginpatawag pa si Atty Mirano matapos ang deficit sa nakaligad nga kapiestahan kag nanabunan ang alkalde sang P6 million, kag luyag lamang nila nga indi na maliwat ang hitabo.
Gani ginpaathag ni Espino nga bangod ang MOA ang kasugtanan sa tunga sang duha ka partido, bilang pagtahod sa SP nga naghatag otoridad agud madayun ang kasugtanan nagakadapat lamang nga magreport sa ila ang Bacolod Yuhom Foundation.
Suno diri, ini ang karun lamang natabo bangod sadto ang City Government ang nagapagwa lamang sang kwarta para sa assisstance sa mga Barangay nga magapasakop sa Street Dance and Arena Competition.
