Kadungan sang iya nga pagtambong sa una nga flag raising ceremony bilang alkalde sang ciudad sang Bacolod, naghingyo si Mayor Alfredo Benitez sang suporta sang mga empleyado.
Sa iya nga speech sa Bacolod City Government Center kaina sang aga, nagpangayo ini sang pasensya kag paghangop nagikan sa mga department heads bangud ini ang labing-una niya nga tion nga magpungko bilang chief executive sang isa ka syudad.
Apang ginpasiguro man sini nga mangin epektibo siya bilang alkalde apisar nga bag-uhanon siya sa trabaho.
Nagpanugyan man ini sa mga empleyado sang syudad nga dapat magserbisyo sang maayo bangud ginhatagan sila sang mga pumuluyo sang mandato.
Nagpanawagan man ini sa tanan nga dululungan sila nga mag-umpisa nga fresh ukon ireset ang button sa paghatag sang serbisyo sa mga pumuluyo.
Suno kay Benitez, kinahanglan nga mag-umpisa liwat bangud mahimo nga may nalipat na sang basic mandate sang tagsa ka opisina.
Ginpahayag man sini nga ang tanan nga mga empleyado sang syudad ang hatagan sang pagtamod kag importansya ang ginahatag nga serbisyo.
Suno pa sa alkalde, nagakadapat nga panumdumon ang kaayuhan sang mga pumuluyo kun magserbisyo.
