Ginwelcome sang general manager sang Bacolod City Water District (BACIWA) ang panawagan ni Mayor Alfredo Benitez nga “Isugid kay Mayor” kun may problema sa tubig.
Kahapon, nagpost ang alkalde sa iya official Facebook page sang Citizen Water Watch kun sa diin sarang nga mascan sang mga pumuluyo ang QR code agud makasend sang report ukon reklamo tuhoy sa water supply sa ila lugar.
Sa interview sang Bombo Radyo kay BACIWA General Manager Mona Dia Jardin, wala sang problema sa iya ang inisyatibo ni Benitez kag ginawelcome ini sang water district.
Suno kay Jardin, may mga areas kag mga consumers nga indi nila malab-ot gani makabulig ang mga ginabutang nga komento sang pumuluyo agud ila ini makadtuan kag mahatagan sang nagakaigo nga solusyon.
Mas maayo man suno sa iya kun icoordinate sang city government sa iya ang mga complaints nga ila nagakabaton nagikan sa mga konsumedor.
Aminado ini nga sa karun kulang pa ang water supply sa ciudad apang yara sila sa karun sa tunga sang transaksyon sa Murcia Water District kag ginalantaw nga ang LGU ang makasupply sang 50 million liters kada adlaw.
Kun ini ang madihon, ginalauman suno kay Jardin nga mangin supisyente na ang tubig sa masunod nga tuig.
