Ginsapol ni Bacolod City Mayor Alfredo Benitez ang mga tiglawas sang Bureau of Fire Protection, Department of Social Services and Development kag iban pa nga nagaresponde sa tion nga may sunog bangud sa pila ka lapses nga nakit-an sini kadungan sang sunog sa Purok Magnolia, Barangay 7, ciudad sang Bacolod kagab-i.
Suno kay Benitez, ginpatawag niya ang tanan nga nagaresponde kun may sunog lakip na ang mga barangay officials agud maaddress ang mga problema nga nakita sini kagab-i sang nagbisita ini mismo sa lugar.
Pag-abot sini sa Purok Magnolia, anom pa lang ka balay ang nasunog apang naglapta pa gid ini sa iban nga pamalay bangud wala gilayon napalong.
Suno sa alkalde, isa sa mga problema amo ang pagkaubos sang tubig sa fire truck kag makitid nga dalan pasulod sa fire scene.
Suno kay Sally Abelarde, officer-in-charge sang Department of Social Services and Development, may ginahatag sila nga food pack kag used clothing sa mga nasunugan.
Magapatigayon naman sila sang validation agud nga mahatagan sang financial assistance ang mga pamilya nga apektado.
Sa kinaandan, P15,000 ang ginahatag sa totally-burned ang balay; P10,000 sa partially-burned kag P5,000 sa sharer kag renter.
