Pabor ang alkalde sang Bacolod sa plano nga tungaon ang ciudad sa duha ka legislative district kun sa diin may yara sang duha ka representative sa House of Representatives apang isa lang ang alkalde.
Ini ang kasunod sang kumpirmasyon ni Lone District Rep. Greg Gasataya nga gin-refile sini sa 19th Congress ang hagna nga nagatuyo nga tungaon ang Bacolod sa duha ka congressional districts.
Suno kay Mayor Alfredo Benitez, kuntani mapasar sang Sangguniang Panlungsod ang resolution nga kinahanglan sang House Committee on Local Government agud nga mapatigayon ang hearing, maaprubahan kag madeliberate ang hagna sa plenaryo sang Kamara.
Sang tuig 2019, ginfile ni Gasataya ang hagna apang wala ini nagpasar ang City Council sang resolution nga isumiter sa House committee gani wala ini napasar tubtub natapos ang 18th Congress.
Suno kay Benitez, madugay na ginaplano ang pagtunga sang Bacolod gani kuntani matigayon na ini.
Sa idalom sang House Bill 297, ang First Legislative District ang lakipan sang Barangays 1 to 31, 33, 41, Alangilan, Banago, Bata, Estefania, Granada, Mandalagan, Monte Vista, Villamonte kag Vista Alegre samtang ang Second Legislative District ang lakipan sang Barangays 32, 34 tubtub 40, Alijis, Cabug, Felisa, Handumanan, Mansilingan, Pahanocoy, Punta Taytay, Singcang, Sum-ag. Taculing kag Tangub.
Santo sa hagna, isa lang ang alkalde sang Bacolod apang ang kada distrito ang may yara sang tag-walo ka miyembro sang Sangguniang Panlungsod.
