Gintawag nga misteryoso kag indi mapatihan ni outgoing Bacolod City Mayor Evelio “Bing” Leonardia ang nangin resulta sang May 9 local elections sa ciudad.
Sa statement nga ginpagwa ni Leonardia, ginpahayag sini nga madamo sang mga Grupo Progreso supporters ang nakibot sa nangin resulta.
Suno sa iya, santo sa mga obserbasyon sang pila ka mga quarters kag sa reports nga ginhatag sa ila sang mga poll watchers, nagapati ang mga ini nga may mga iregularidad sa pag-isipay, magluwas sa kwestiyunable nga malfunctioning sang pila ka mga VCMs nga nagtuga sang pagduda kun patas gid man bala ang pagpatigayon sang Eleksyon kag kredibilidad sang accuracy sang electronic transmission sang pagdeliver sang boto nagikan sa mga precincts padulong sa Comelec canvassing center.
Suno sa alkalde, indi mapatihan ang resulta bangud humalin sang una nga adlaw sang pagpangampanya, madamo ang nagatambong sa sorties kag mga caucus sang Grupo Progreso apisar nga wala sang “hakot” nga natabo.
Ginakabig man sini nga record breaking ang mga nagtambong sa “miting de avance” sang Grupo Progreso sang Mayo 7.
Ginpasalamatan sini ang tanan nga nagsuporta kag nagpabilin sa Grupo Progreso sa maayo kag mabudlay nga mga tinion.
Nakahibalo ini nga madamo ang tubtob sa karun indi sa gihapon makapati bangud “mysterious” kag “unbelievable” ang abanse sang kasumpong sini nga si incoming Mayor Albee Benitez ilabi na sa mga lugar nga ila ginakonsiderar nga bailiwick.
Sa karun, suno kay Leonardia, ipabilin sini sa iya legal team ang pagtuon kag pag-imbestiga sa posible nga mga legal remedies agud marecheck ang mga vote counting machines agud masabat ang mga pamangkot nga ginraise sang Grupo Progreso slate tanan kag tanan nila nga mga supporters.
