Nagpabutyag sang pagkabalaka si Bacolod City Mayor Evelio “Bing” Leonardia kasunod sang hinali nalang kag indi natural nga pagsaka sang transferee-registrants gikan sa luwas sang syudad nga nagapadulong sa Commission on Election (COMELEC) Bacolod Office sini nga semana.
Bangod sini, ginpanawagan sang alkalde kay Atty. Ma. Fatima Aspan nga mag-inhibit bilang acting Election officer sa syudad agud mapreserbar ang integridad sang nagapadayun nga proseso sang voter’s registration.
Si Aspan, nga amo ang sa karun provincial election supervisor sa Negros Occidental, ang gindesignate bilang acting election officer sa Bacolod humalin sang Setyembre 14 ni Comelec Regional Director Wilfredo Jay Balisado, kasunod sang pagpositibo sa COVID-19 sang staff sa Bacolod Comelec Office.
Samtang nagnegatibo naman ang RT-PCR result ni Incumbent Bacolod City Election Officer Kathrina Trinio Caña sang Setyembre 15.
Sa letter nga ginpadala kay Aspan nga napetsahan Setyembre 17, kag nabatun ang kopya sini sang iya opisina sang Sabado, Setyembre 18, gintawagan ni Leonardia ang atensyon sini nga nagapahanumdom nga ang designation sini ang temporaryo lang kag tubtob lang sa paggwa sang negatibo nga resulta sang RT-PCR test ni Caña.
Panindugan ni Leonardia nga si Aspan, ang padayun gihapon nga nagsupervise sa affairs sang Comelec Bacolod, kalakip na ang nagapadayun nga voter’s registration bisan pa naggwa na ang negatibo nga RT-PCR test ni Caña.
Ginpahayag sang alkalde nga wala ini sang delicadeza, kag may dako nga impresyon sa presensya sini sa Bacolod Comelec kadungan sa kwestyonable nga pagsaka sang transferee-registrants gikan sa luwas sang syudad ilabi na sang mga lugar nga anay ginserbisyuhan ni Alfredo Benitez bilang Kongresista.
Ginpakigbahin pa sini nga sang Miyerkules, ginpahayag sang mga personnel sa Bacolod Police Station 1 nga tuman kalaba ang linya gikan sa Bacolod Comelec area panaog sa SM City bisan alas-4:00 palang sang kaagahon.
Kasunod nga adlaw, naglapaw gihapon sa 300-meter mark ang mga nagapila gikan sa Comelec Office, labay sa plaza band stand tubtob sa Gatuslao Street.
Ginpakigbahin man sang alkalde nga isa ka apa kag bungol nga gikan sa Bago City ang nalipungan bangod sa kainit.
Ginpakigbahin sini sa DRRMO rescue unit nga wala pa ini makapamahaw kag gintinguhaan nga makapatransfer sang voter’s registration bangod gin-offeran ini sang P1,000.
Ang iban pa nga mga voter-transferees ang gikan pa sa hacienda sa banwa sang Isabela, kag barangay sa Talisay, Silay kag Victorias City, Negros Occidental.
