Ginkasubo man sang alkalde sa syudad sang Bacolod ang kapierdihan sang 8-Division World Champion nga si Senator Manny Pacquiao batok sa Cuban Boxer nga si Yordenis Ugas sa T-Mobile Arena sa Las Vegas, Nevada kahapon.
Suno kay Bacolod City Mayor Evelio “Bing” Leonardia, luyag sang bilog nga Pilipinas ang kadalag-an sang Pambansang Kamao.
Apang ginlantaw man sang alkalde ang mga factors nga nagtuga sa pagkalutos sini kalakip na ang madugay nga wala makahampang sa ring nga nagdangat sa duha ka tuig.
Dugang pa sini nga naka-apekto man sa hampang ang kadakuon sang kasumpong nga Cuban boxer.
Apisar sa ginaduso sang kampo ni Pacman nga patumbahon ang kontra, nangin mabudlay naman ini sa ring icon ilabi na sa edad sini nga 42 anyos.
Suno kay Leonardia, sa kadamo na sang pagdaog ni Pacquiao, apisar pa magdesisyon ini sa pagretiro, igapasalamat man sang mga Filipino ang memorya nga ginbilin sini sa patag sang boksing.
Dugang pa sang alkalde nga indi na mapanas sa maragtas sang boksing ang nabuhat ni Pacquiao nga nangin 8-Division World Champion.
Suno pa kay Leonardia, ginapahayag man sang mga abyan sini nga boxing enthusiast humalin pa sadto, nga tuman ka budlay ang pagsulod sa masunod nga weight division bangod kaangay ini nga ang grade 2 ang maga-away batok sa grade 3 ukon grade 4.
Diri naman nakita ang abilidad sang Fighting Senator apisar sa deperensya sa bug-at, apang napamatud-an sang Filipino Champion ang iya nga kaugalingon.
Dugang pa sang alkalde nga wala na sang nakasunod sa record ni Pacquiao bangod bisan sanday Oscar De La Hoya ang kutob lang sa apat samtang si Mayweather naman ang yara sa 4 tubtob 5 Division lang ang nasarangan.
Apang ginpakigbahin man sini nga apisar mas mataas ang nalab-ot ni Pacquiao, si De La Hoya ang ginpatukuran sang estatwa sa staple center, samtang diri naman sa Pilipinas masami nga nagakahatagan lang sang pagkilala ang isa ka persona kun magtaliwan na.
Dugang pa sini nga kun nagtaliwan na kag hatagan sang pasidungog, madamo naman ang malipat na sa hinimuan sini gani, ginalauman sang alkalde nga may makapinsar nga maghuman sang layi sa Pilipinas nga kaangay sa ginabuhat sa Estados Unidos.
Paathag ni Leonardia nga nagapabilin ang legasiya ni Pacquiao kag makabig na ini nga daog bisan ano paman ang matabo.
