Nagpakig-angot na si Bacolod City Mayor Evelio “Bing” Leonardia kay Iloilo City Mayor Jerry Treñas angot sa biyahe sang mga fastcraft kag roll-on roll-off vessel sa Bacolod-Iloilo vice versa sumugod sa Mayo 16.
Sa interview sang Bombo Radyo Bacolod kay Leonardia, ginpahayag sini nga gintawgan niya kahapon si Treñas agud pamangkuton ang panan-awan sini sa kahimtangan sang duha ka mga ciudad.
Suno sa alkalde, ila nahambalan nga libre na ang ‘flow’ sang mga pasahero apang dapat nga iobserbar sang husto ang social distancing.
Paathag sini, dapat tunga lamang sang passenger capacity sanag isa ka sakayang-pandagat ang mahimo makasakay kun magsugod na biyahe ang mga ini.
Dugang pa ni Leonardia, nagapati sila ni Treñas nga indi infected sang virus ang mga pumuluyo sang Iloilo City kag Bacolod City.
Kasunod ini sang pagdeklarar sang national inter-agency task force (IATF) nga isa ang Region 6 sa makabig nga low-risk areas angot sa COVID-19.
Samtang, ginkumpirmar man ni Leonardia nga wala pa sila naka-istoryahanay ni Negros Occidental Governor Eugenio Jose “Bong” Lacson angot sa biyahe sang Ceres buses bangud ang terminal sini ang yara man sa Bacolod.
Nahibaluan nga nag-apelar ang gobernador sa IATF nga mapabilin sa General Community Quarantine ang probinsya tubtob sa Mayo 31.
Sa karon, ginapareview na ni Leonardia ang guidelines sang Department of Transportation angot sa pagbalik sang biyahe ilabi na sa mga public utility jeepneys (PUJs).
