Nagpanindugan si Bacolod City Mayor Alfredo “Albee” Benitez nga may legal nga basihan sa pagpadayun sang pagrenovate sang Bacolod Old City Hall.
Suno sa alkalde ginklaro sang Bacolod City Legal Office nga humalin pa lamang sang 1934 may clean title na ang Bacolod City.
Gani ginakatingala man ini nga hinali na lamang nagkwetyon si former Councilor Archie Baribar, nga sadto amo ang nagadepensa sa ciudad.
Panindugan ni Benitez, nga legally, wala sang rasun para untaton ang rennovation.
Isa pa sa luyag sini nga mahibaluan kun ano ang relasyon sang complainant kay Jose Ruiz De Luzurriaga, nga anay tag-iya sang duta nga gintukuran sang Bacolod Old City Hall.
Ginakatingala sang alkalde kun ngaa karun lamang may complaint apisar nga madugay na nga may clean title ang ciudad.
Kun ang ginapanindugan amo nga gindonar sang pamilya Luzuriaga ang duta sa kondisyon nga ini ang tukuran lamang sang City Hall sang Bacolod City, wala man sang paglapas ang ciudad, bangod apisar ginguba ang old structure, ang tukuron nga bag-o ang pagdumalahan man gihapon sang Bacolod City Government.
Sa bahin naman sa concern sa historical significance sang estraktura, sila ang una nga nagpangayo sang permiso sa National Historical Commission kag sila ang gintugutan bangod ang nalakip lamang sa historical herritage amo ang fountain, kag amo lang ang indi pwede matandog.
