Ginakasubo ni Bacolod City Mayor Greg Gasataya nga sa pihak sang bagyo, madamo sa gihapon sang nagapalapta sang fake news sa social media angut sa pagbaha sa ciudad.
Sa interview sang Bombo Radyo Bacolod sa alkalde, natukiban ang pagdamo sang fake news nga nagalibot sa social media, lakip na ang paggamit sang mga daan na nga mga video kag pictures sang pagbaha.
Suno kay Gasataya, ang patalang nga mga contents ang nagahatag sang kahangawa sa mga may himata sagwa sang ciudad.
Nagakasubo ang alkalde nga sa tion sang kalamidad, may yara pa sang mga indibidwal nga ginapili nga magapalapta sang fake news bangud lamang sa views, likes, kag content monetization.
Suno diri, wala sang problem kun mag-upload sang videos sang pagbaha sa social media kun ini ang matuod nga nagakatabo agud mahimuan gilayon sang tikang sang ciudad.
Paathag sini nga ang ciudad, paagi sa Bacolod City Disaster Risk Reduction and Management Office (CDRRMO) kag iban pa nga ahensya, ang hugot nga naga-monitor sa sitwasyon sa mga kabarangayan kag nagahatag sang update sa sitwasyon nga nakabase gid lamang sa verified information.
Ginpasiguro sang Alkalde nga himuan sang tikang agud mapasabat ang nagapalapta sang fake news.
Mensahe ni Gasataya sa mga pumuluyo ilabi na sa mga yara sa low-lying areas nga mag-aligmat kag gilayon nga magpahibalo sa CDRRMO kun may ma-eksperyensyahan nga pagbaha.
