Ginapareview ni Bacolod City Mayor Greg Gasataya sa Bacolod Environment and Natural Resources Office (BENRO) ang kontrata kag performance sang International Solid Waste Integrated Management Specialists, Inc. (ISWIM).
Sa interview sang Bombo Radyo Bacolod sa alkalde, matapos na ang kontrata sang ISWIM sa garbage collection kag management sang sanitary landfill sa katapusan sang Disyembre.
Santo sa kontrata, P327.9 million ang balayran sang ciudad sa bahin sang garbage collection kada tuig; samtang P109 million naman ang balayran sang ciudad para sa management sang landfill.
Padayun naman ang pagproseso sa mga dokumento para sa operasyon sang Cell No. 5.
Sa kontrata, ang ISWIM ang kinahanglan makahakot sang indi magnubo sa 800 cubic meters nga basura kada adlaw.
Apang sa karun, ang reported collection sa kada adlaw ang nagadangat na sa 900 tubtob 1,200 cubic meters.
Ginareview ang kontrata kag performance agud matsekyar kun natuman sang ISWIM nga mangin basihan inkaso sila ang magapasakop sa bidding process, para sa waste collection sa masunod nga tuig.
