Ginpahanumdom sang alkalde sa ciudad sang Bacolod nga iverify anay ang mga impormasyon nga madawat sang social media bangod madamo sang nagapalapta sang fake news.
Ini kasunod sang paglapta sang announcement tuhoy sa gina-alegar suspension of classes para sa subong nga adlaw, nga kalabanan ginpalapta sa mga group chats.
Ang peke nga announcement ang may-ara man sang logo sang Bacolod City Government, gani madamo sang nagpati.
Sa interview sang Bombo Radyo Bacold kay Mayor Greg Gasataya, ginkumpirmar sini nga sila ang wala nakapagwa sang executive order angot sa suspension sang klase.
Pahanumdom sang alkalde nga agud makaseguro kun legit ang announcement, magdangop sa iya facebook account bangod ini ang ginapost man niya.
Kasubong man sa official facebook page sang Bacolod City Government nga Bacolod Stronger Together.
Magluwas sa announcement, may naglapta man nga video sang malala nga pagbaha sa Barangay Mandalagan atubang sang Bombo Radyo Bacolod, apisar nga mainit na ang tiyempo.
Ginpaathag ni Secretary to the Mayor Atty. Marty Go, nga wala nakasulod sa existing DEPED guidelines para sa class suspensions ang weather condition kaina sang aga.
Aminado ini nga may pag-ulan sang aga, apang nagkanay man gilayon ang panahon.
Sa pihak sini, nag-anunsyar sang suspension of classes ang Colegio San Agustin – Bacolod.
Sa advisory sang eskwelahan, ginsuspender ang onsite classes para sa safety sang mga estudyante kag manunudlo bangod sa malain nga tiyempo.
Agud maseguro ang learning continuity, patigayunon ang online synchronous kag asynchronous set-up.
Ang exam sang Senior High School kag College activity nga nakaschedule subong nga adlaw ang igareschedule na lamang.
