Ginpakakas ni Bacolod City Mayor Greg Gasataya ang mga trash bin sa gwa sang Burgos Public Market agud wala sang magtumpok nga basura.
Suno sa alkalde, kun may trash bin sa gwa, wala nagadali ang mga vendors sa paghaboy sang ila basura antes kuhaon sang garbage collector.
Suno diri, kun kaisa matapos na makuha ang mga basura kag amo pa lang paghaboy sang iban amo nga madamo sa gihapon sang basura nga nagalapta.
Pahayag ni Gasataya, may yara sang schedule nga ihatag sa mga vendors kun san-o sila mapagwa sang ila basura.
Samtang, tinguhaan naman sang Bacolod Environment and Natural Resources Office (BENRO) kag City Administrators Office nga mahimo ang flushing acitvity duha ka beses kada bulan.
Suno kay Allyn Luv Dignadice, Officer In Charge sang BENRO, iplastar na nila ang plano agud masustain ang pagpaninlo kag pagkuha sang basura.
Suno diri, tinguhaan man nga matigayon ang flushing activity duha ka beses kada bulan apang nagapangayo ini sang suporta halin sa mga vendors agud mapabilin na nga malimpyo ang merkado. SAMTANG….ginkalipay sang mga vendors sa Burgos Public Market nga malimpyo na kag wala na sang mapanimahoan nga baho sang basura sa merkado.
Sa interview sang Bombo Radyo kay Fernando Polinario, vendor sa merkador, sadto ang basura naga-obstruct sa dalan kag tuman ka baho sang area nga ila lang gina-agwanta samtang ginareklamo man nila nga mayab-ok ang lugar.
Suno diri, nalipay sila sa ginpatigayon nga flushing activity sa merkado nga sa karun wala na sang yab-ok kag wala naman sang baho sa merkado.
Pahayag ni Polinario, indi lamang sila nga mga vendors ang nagapasalamat kag nagakalipay apang kasubong man ang mga manugbakal sa merkado.
Samtang nagpanawagan man ang iban nga vendors sang dugang pa gid nga improvement sa merkado.
Suno kay Beltran Villanueva, rice vendor sa Burgos Public Market, sa tion nga mag-ulan nagatulo sa iya nga stall.
Bangod sini ginasira na lang niya ang iya store kag indi na lang magbaligya sang sa mabasa pa ang iya bugas.
Ginapasalamatan sini nga malimpyo na ang gwa sang merkado apang nagapanawagan ini sang dugang pa gid nga mga improvement.
