Ginpasalig sang alkalde sa ciudad sang Bacolod nga ginamonitor nila ang status sang mga proyekto nga napondohan paagi sa loans.
Ini kasunod sang tensyon sa tunga nanday House Deputy Speaker and Bacolod City Lone District Representative Alfredo “Albee” Benitez kag Councilor Homer Bais.
Sa interview sang Bombo Radyo Bacolod kay Bacolod City Mayor Greg Gasataya, ginapakamaayo sini nga nagpangayo na sang pasaylo sa kada isa ang duha ka opisyal, ilabi na nga parehas man nga transparency ang ila nga ginapangita.
Panindugan sang alkalde nga ang importante amo nga mahibaluan sang publiko ang status sang mga proyekto nga napondohan paagi sa loans halin sa Leonardia Administration tubtob sa Benitez Administration, apang nagapadayun pa ang construction tubtob sa iya administrasyon.
Suno kay Mayor Greg, sa iya State of the City Address, kalakip man sa iya gin-update ang status sang ginatukod nga Bacolod Masskara Coliseum kag Museum.
Paathag naman sang alkalde nga ang P4.1 billion sang Benitez Administration ang indi lamang para sa Legislative Building.
Ini bangod kabahin man sa napondohan sini ang halos tapos na nga warehouse sang General Services Office (GSO) kag ang motorpool sang City Engineer’s Office sa reclemation area.
Suno sa alkalde, sa ulihi niya nga pagtsekyar halos tapos na ang mga proyekto kag ini ang ischedule na lamang para sa blessing.
Kasubong man ang Bacolod City Health Complex, nga halos natapos naman ang phase 1, kag mahimo makasugod na sa phase 2.
