Nagmando si Bacolod City Maypr Greg Gasataya nga imbestigaran kun paano natabo nga napabay-an ang 4,800 ka sako sang semento tubtob nga nagtig-a na sa warehouse sang City Engineers Office.
Sa interview sang Bombo Radyo sa alkalde, nakabaton siya sang impormasyon angot sa linibo ka sako sang semento nga napabay-an kag iya ini mismo gin-validate.
Suno diri, sang Agosto 27 nagpagwa siya sang memorandum nga na-addres sa tatlo ka empleyado nga gikan sa City Internal Audit, General Services Office kag City Engineer’s Office, agud tsyekyaron ang mga stocks kag supplies sa warehouse sang City Engineer’s Office bangod sa bulan sang Oktubre na ipasa ang proposed budget sang ciudad para sa tuig 2026.
Suno pa diri, luyag niya nga makita kun paano gina-utilize ang budget sang nagkalain-lain nga departamento sang ciudad.
Natumod nga 12,000 bags sang semento ang nakatambak sa lugar kag 4,800 na ang nagtig-a.
Gintawag ni Mayor Greg ang natabo nga insulto para sa mga taxpayers.
Bangod sini, nagmando si Gasataya nga imbestigaran kun ano ang rason nga napabay-an ang mga semento, sin-o ang responsable diri kag kun san-o pa ini natabo.
Pagatun-an man suno diri kun ano ang dapat nga himoon sa mga nagtig-a na nga semento kag kun ini mahimo pa nga mahatag ukon magamit.
Sa karun, padayon pa ang inventory sa tanan nga stocks kag supplies sa City Engineer’s Office.
