Nagpirma sang duha ka Executive Orders si Bacolod City Mayor Greg Gasataya kadungan sang iya nga pagpungko sa iya opisina kahapon.
Una diri ang amo ang Executive Order No. 001 Series of 2025 nga may kaangtanan sa pagtukod sang Senior Citizen Center sa Bacolod City kag ang ikaduha ang Executive Order No. 002 Series of 2025 nga nagamando sa tanan nga city government personnel nga magbalik sa ila respective mother units ukon original plantilla assignments.
Sa pahayag ni Mayor Gasataya, nagapasalamat ini sa mainit nga pag abi-abi sang mga empleyado sang Bacolod City Government sa iya pagpungko bilang alkalde.
Suno kay Gasataya, hatagan sini sang prayoridad ang pagpadayon sang mga serbisyo bangud ang Government function ang wala man nagauntat.
Suno sa alkalde magatrabaho ini para sa kaayuhan sang ciudad kasubong man para maghatag sang serbisyo para sa mga pumuluyo.
Samtang pila sa mga executive assistants sini amo sanday Aaron Bais sa idalom sang Bacolod Transportation and Traffic Management Department (BTTMD), anay SK Federation President Ayesha Villaflor apang wala pa sang confirmation sang iya designation, kag isaylo man si anay Bacolod Traffic Authority Office Head Patrick Leonard Lacson apang wala pa makumpirmar kun sa diin nga departamento.
Ang City Legal Officer amo si Atty. Karol Joseph Chiu, Secretary to the Mayor si Atty. Marty Go kag ang City Administrator amo si Atty. Mark Steven Mayo.
