Nagpagwa sang memorandum ang Bacolod City Mayors Office nga wala na ginapahanugotan ang mga empleyado sang city government nga magproseso sang mga dokumento sang mga pumuluyo agud malikawan ang fixers.
Madumduman nga duha ka empleyado ang gindagdagan sang showcause order bangod nga nagaserbe ang mga ini bilang fixers.
Isa ang gikan sa Bacolod Environment and Natural Resources Office (BENRO) nga nagbaton sang P40,000 kag ang isa ang gikan sa City Treasurer’s Office nga nagbaton sang P12,000.
Suno kay Stella Rose Rayos, Business and Permits Licensing Office Head, napalapta na sa mga department heads ang memo nga indi magproseso ang mga empleyado sang mga dokumento kun indi man nila trabaho.
Panugyan sini sa mga magaproseso sa city government nga dapat magpalapit lang sa mga empleyado nga may ID.
Samtang, ang city legal office naman ang maproseso kun ano ang posible nga matabo sa mga madakpan nga fixers.
As of January 14, may masobra sa 12,000 na ka naka-issue sang mayors permit kag business permit nga mas madamo kun ikumpara sa amo man nga timeline sa nakaligad nga tuig.
