BACOLOD CITY-Nagdangat na sa 20 ang numero sang positibo nga kaso sang coronavirus disease sa ciudad sang Bacolod samtang nagdangat naman sa 17 ang positibo nga kaso sa probinsya sang Negros Occidental.
Subong lang nga hapon, gin-anunsyar sang Department of Health Region 6 nga may isa ka locally stranded individual kag isa ka repatriated OFW sa Bacolod nga nagpositibo sa COVID.
Ang LSI ang 35 anyos nga lalaki samtang 38 anyos naman ang repatriated OFW kag yara sila sa karon sa quarantine facility.
Samtang tatlo naman ka LSI kag isa ka repatriated OFW sa Negros Occidental ang nagpositibo man sa RT-PCR test.
Ini ang ginalakipan sang 29 anyos nga taga-Sagay City, 24-anyos nga babayi nga taga-Talisay City kag 35-anyos nga lalaki nagikan sa banwa sang Cauayan para sa LSIs kag 40 anyos nga lalaki nagikan sa Sagay City ang repatriated OFW nga nagpositibo sa COVID.
Suno kay Mayor Niel Lizares, ini ang labing una nga positibo nga kaso sang COVID sa ciudad sang Talisay.
Suno sa alkalde, ang Patient No. 14 ang 24 anyos nga babayi nga locally stranded individual nagikan sa Cebu.
Siya ang nagpauli diri sa probinsya sang Hunyo 4 kag gindiretso sa quarantine facility sa Cadiz City kag ginkuhaan sang swab sample.
Hunyo 6, ginsaylo ang LSI sa quarantine facility sang Talisay City kag kaina lang naggwa sang resulta sang swab tets nga siya ang positibo sa COVID.
Gilayon naman ini nga ginsaylo sa Provincial Healing Center sa EB Magalona.
Ginseal off naman ang isa ka purok sa Barangay Zone 4-A kag ginpatigayon ang contact tracing sa mga nakapalapit sa iya.
Suno kay Bacolod City Councilor Israel Salanga, chairman sang action team on returning OFWs, ginpagwa kaina sang DOH ang resulta sang RT-PCR test sa mga repatriated OFWs.
Nagikan sa malapit 200 nga ginahulat nga resulta, masobra 100 lang ang nag-abot kag kalabanan sa mga ini ang negatibo sa COVID.
