Nagdeklarar sang suspension sang face-to-face classes ang Bacolod City bangod sa forecasted maximum heat index sa Negros Occidental nga 40 degrees Celsius.
Kapin alas-10:00 sang aga, nagpagwa man sang Executive Order si Bacolod City Mayor Alfredo “Albee” Benitez nga nagasuspender sang face-to-face classes subong nga adlaw Marso 6 tubtob bwas Marso 7
Ini ang ipatuman halin sa Preschool tubtob Senior High School sa pampubliko man ukon pribado nga buluthuan.
Sa interview sang Bombo Radyo Bacolod kay Councilor Claudio Jesus “Kalaw” Puentevella, chairperson sa Committee on Health and Education sa Sangguniang Panlungsod, ginaproteksyonan lamang sang alkalde ang health sang kabataan.
Pahanumdom sini nga indi lahog-lahog ang 40 tubtob 41 degrees Celsius heat index tubtob sa kasunod nga adlaw.
Aminado ini nga may mga buluthuan nga naka-aircondition apang madamo sang kulang ang ventilations ukon mga electricfan.// Nagalaom si Puentevella nga ang tikang ang mahangpan sang mga ginikanan.
Nakadepende naman sa eskwelahan kun sila ang magapatuman sang blended learning.
Suno diri, ang desisyon ang ginpagwa ni Mayor Albee agud mapalayo ang mga kabataan sa mga balatian nga mahimo makuha sa tuman nga init.
Sa classification sang National Weather Bureau, ang 27 tubtob 32 degrees Celsius ang may classification sang Caution sa posibilidad sang fatigue kun malawig ang exposure ukon aktibidad sa kainitan nga mahimo magdangat sa heat cramps.
Extreme Caution sa 33 tubtob 41 degrees Celsius nga may posibilidad nga makatuga sang heat cramps kag heat exhaustion nga mahimo magdangat sa heat stroke.
Danger sa 42 tubtob 51 degrees Celsius nga may mataas nga tyansa nga makatuga sang heat cramps kag heat exhaustion, kag mahimo magdangat sa heat stroke sa malawig nga exposure.
Kag Extreme Danger para sa 52 degrees Celsius pasaka nga may mataas nga tyansa sang heat stroke.
