May mga personnel na nga ginmanduan sa pagtsekyar sa rate sang mga hotels kag presyo sang mga balaklon kadungan sa price freeze matapos ginpaidalom sa State of Calamity ang Bacolod City bangod sa Bagyo TINO.
Sa interview sang Bombo Radyo Bacolod kay Bacolod City Administration Atty Mark Steven Mayo, nagpagwa na sang executive order si Bacolod City Mayor Greg Gasataya sa pagtukod sang Price Monitoring Council in coordination sa Department of Trade and Industry (DTI).
Suno kay Mayo, nagpanaog na sila sang instruction sa City Tourism Office sa pagdeploy sang personnel nga magamonitor sa rate sang mga hotels.
Ang Pemits and Licensing Office ang nagdeploy naman sang personnel upod sa joint inspection team sa paglibot sa mga establishimento agud maseguro nga wala sang naga-over pricing.
Kahapon, nagsapol naman sila sa mga asosasyon sang mga water reffiling stations bangod sa mga report nga may ara sang nagpasaka sang presyo.
Willing man ang mga ini nga magbulig, kag nagkomiter man sa pagsupply sang tubig.
Ini bangod ang City Government ang nagadul-ong sa karun sang mainom kag panghugas nga tubig sa mga area nga wala sang supply sang tubig gikan sa Prime Water.
Aminado si Mayo nga may mga subdivision nga may-ara sang water tank sa pagprovide sang tubig apang indi maka-operar bangod brownout.
