Nadugangan kahapon sang 131 ang kaso sang COVID-19 sa ciudad sang Bacolod samtang 28 naman ang nagdugang sa probinsya sang Negros Occidental.
Sa Department of Health Region 6 COVID-19 case bulletin no. 155, nakarecord ang Western Visayas sang 180 ka dugang nga mga kaso nga ginalakipan sang 131 sa Bacolod City, 28 sa Negros Occidental, 16 sa Iloilo City, samtang lima naman ang sa Iloilo Province.
Sa 180 ka panibag-o nga kaso, 125 diri ang local cases, anum ang locally stranded individuals (LSI), apat ang returning overseas Filiinos (ROF), isa ang authorized person outside residence (APOR) samtang 44 naman ang for verification.
Sa karun, may ara na sang kabug-usan nga 4,253 ka mga kaso ang narecord sa Western Visayas nga may 1,948 ka mga aktibo nga kaso sa pagdugang sang 180.
Samtang 2,239 naman ang mga nakarecover sa pagdugang sang 107 nga bag-o kag nagdangat naman sa 66 ang numero sang nagtaliwan sa pagdugang sang anum nga napatay.
Yara naman sa 76.44% ang asymptomatic sa kabug-usan nga kaso sang rehiyon.
Sa karon, may yara na sang 1,108 ka mga kaso ang ciudad sang Bacolod samtang 1,099 naman sa probinsya sang Negros Occidental.
