143 ka dugang nga kaso sang coronavirus disease ang narekord kahapon sa Bacolod City samtang 41 naman sa Negros Occidental.
Sa COVID-19 Regional Case Bulletin No. 163 nga ginpagwa sang Department of Health Western Visayas kahapon, 253 ka mga kaso ang narekord sa rehiyon kun sa diin 143 ang nagikan sa Bacolod; 41 sa Negros Occidental; 35 sa Iloilo City; 21 sa Iloilo; 12 sa Capiz; kag isa sa Guimaras.
Samtang, 52 ka mga pasyente ang nag-alayo sa balatian kun sa diin 23 ang nagikan sa Iloilo province; tag 14 sa ciudad sang Bacolod kag Iloilo kag isa sa Negros Occidental.
Wala naman sang may narekord nga fatality sang COVID-19 sa rehiyon kahapon.
Sa latest nga data, nagdangat na sa 5,954 ang kabug-usan nga mga kaso sang coronavirus sa Western Visayas kun sa diin 2,953 ang aktibo, 2,914 ang nag-alayo kag 87 ang nagkalamatay.
Sa karun, may yara na sang kabug-usan nga 1,866 ka mga kaso sa ciudad sang Bacolod samtang 1,452 naman sa Negros Occidental.
Samtang, nakagwa na ang resulta sang RT-PCR test ni Governor Eugenio Jose “Bong” Lacson kun sa diin nagnegatibo ini sa virus, subong man ang iya nga key staff.
