Ginpaidalum ni Presidente Rodrigo Duterte ang National Capital Region kag kaiping nga probinsya sa general community quarantine nga may upod nga restrictions humalin Hunyo 1 tubtob Hunyo 15, 2021.
Sa live briefing ni Presidente Rodrigo Duterte kagab-i, ginpaidalum sini sa modified enhanced community quarantine (MECQ) ang Santiago City, Cagayan; Apayao; Benguet; Ifugao; Puerto Princesa City; Iloilo City; Zamboanga City; Zamboanga Sibugay; Zamboanga Del Sur; Zamboanga Del Norte; Cagayan De Oro; Butuan City; kag Agusan Del Sur humalin Hunyo 1 tubtob Hunyo 15, 2021.
Samtang, sa bilog nga bulan sang Hunyo, magapaidalum sa general community quarantine with restrictions ang National Capital Region kag mga kalapit nga probinsya sang Bulacan, Rizal, Laguna kag Cavite subong man ang Baguio City, Kalinga, Mountain Province, Abra, Isabela, Nueva Vizcaya, Quirino, Batangas, Quezon, Iligan City, Davao City, Lanao del Sur kag Cotabato City.
Ang nabilin nga bahin sang pungsod lakip ang Bacolod City kag probinsya sang Negros Occidental ang yara naman sa modified general community quarantine (MGCQ) tubtob Hunyo 30.
Antes pa man ang pag-anunsyar ni Presidente Rodrigo Duterte sang quarantine status sang Pilipinas kagab-i, nagpagwa sang Executive Order si Negros Occidental Governor Eugenio Jose “Bong” Lacson nga nagapalawig sang modified general community quarantine (MGCQ) status sa probinsya.
Sa EO No. 21-27 series of 2021 sang gobernador nga ginrelease alas-2:00 ang takna sang hapon, ginpalawig sini ang MGCQ status sang probinsya humalin subong nga adlaw Hunyo 1 tubtob sa Hunyo 30, 2021.// Ini bangod santo data sa Department of Health (DOH) Region 6, yara gihapon sa low risk ang Negros Occidental, gani ginlauman na ni Lacson nga magapabilin sa pinakamanubo nga quarantine status ang probinsya.
Dugang pa sini nga ang iya lang nga ginligwat sa karun nga EO amo ang pagpalip-ot sang curfew hours sa probinsya.
Madumduman nga yara lang sadto sa alas-10:00 sang gab-i tubtob alas-4:00 sang aga ang curfew hours.
Apang gin-islan ang pagsulundan sang Abril 15 bangod sa nagasaka nga kaso sang COVID-19 sa probinsya, kun sa diin ginhemo ini nga alas-8:00 sang gab-i tubtob alas-4:00 sang aga.
Apang kasunod sa pagsaka-panaog sang mga kaso, nagdesisyon naman si Lacson nga hemuon ini nga alas-9:00 sang gab-i tubtob alas-4:00 sang aga.
Samtang pahanumdom man sang gobernador nga 4-days week lang gihapon humalin Lunes tubtob Huwebes samtang Work From Home ang ang dalaw sang Biyernes ang trabaho sang Negros Occidental Capitol Employees.
