Igadeploy na subong nga adlaw ang kapin 1,500 ka mga police personnel kag iban pa nga force multipliers para sa pagbukas sang Masskara Festival 2023 nga patigayunon sa Bacolod City Government Center.
Sa interview sang Bombo Radyo kay Police Lt Col Ronnie Brillo, commander sang Bacolod City Mobile Force Company, maga-umpisa na sa pagduty sa tagsa ka mga assigned area ang kapin sa 1,000 ka mga police personnel sang BCPO kasubong man ang 500 ka mga personnel gikan sa augmentation sang Bureau of Fire Protection, Philippine Army kag Coast Guard.
Suno diri, sila ang na-assign sa mga festival sites sa ciudad sang Bacolod, humalin subong nga adlaw tubtob sa highlight sang Masskara sa Oktubre 22.
Pahayag ni Brillo, may yara pa sang ginalauman nga dugang nga masobra sa 1,000 nga katapo sang kapulisan gikan sa Police Regional Office 6.
Yara karun para sa salubong sang Masskara sanday Bacolod City Mayor Alfredo Benitez, Bacolod City Lone District Congressman Greg Gasataya, Negros Occidental Governor Eugenio Jose Bong Lacson, kag iban pa nga mga opisyales kag bisita.
Sa salubong may yara sang fireworks display kag after party celebration nga ginpreparar ang ciudad.
