Ginpasalig sang City Director sang Bacolod City Police Office nga sila ang may nagakaigo nga pahanumdom sa mga police personnel batok sa pag-enggaged sa illegal drug trade.
Ini kasunod sang pagka-aresto sang 10 gikan sa 29 ka mga active kag anay kapulisan nga may warrant of arrest bangod sa involvement sa P6.7 billion drug haul sa Manila sadtong 2022.
Sa interview sang Bombo Radyo Bacolod kay BCPO Director Police Col. Joeresty Coronica, sa pagpungko pa lamang sini sa opisina, ang una niya nga ginpatawag amo ang mga katapo sang drug enforcement team sang kada estasyon.
Ginapahanumdom sini nga isa lamang sa ila ang magpositibo sa paggamit sang illegal nga droga, ini ang makaguba na sa imahen kag kridibilidad sang Philippine National Police partikular na sang BCPO.
Panindugan ni Coronica nga indi sini luyag nga madugangan pa ang higko sa imahen sang PNP, bisan pa mga alegasyon lamang.
Ginapasalig sini nga sa iya liderato, wala gid sini ginatolerar ang kaangay nga mga indi maayo ukon illegal nga buluhaton.
Agud makaseguro, kun may-ara sang mga complaints kaangay sang planting of evidence sa mga drug buybust operations, sila ang may counter intelligence section nga amo ang nagaverify sa validity sang claim.
Magluwas diri may ara man sang internal affairs service kag integrity monitoring enforcement group ang kapulisan.
Pasalig ni Coronica nga kun may-ara sang matukiban nga nagahimo sang illegal nga buluhaton, ang mga ini ang mangatubang sang nagakaigo nga criminal kag administrative charges.
