Ginpasalig sang Bacolod City Police Office (BCPO) nga maga-istrikto sila sa pagpatuman sang health protocols sa ginapatigayon nga Simbang Gabi.
Madumduman nga ginmando ni PNP chief Debold Sinas nga dapat ang pagpatigayon sang Simbang Gabi ang santo sa protocols nga gintalana sang Inter-Agency Task Force for the Management of Emerging Infectious Diseases sa mass gatherings kaangay na lamang sa pag-obserbar sang physical distancing kag pagsuksok sang face mask kag face shield.
Sa interview sang Bombo Radyo Bacolod kay P/Lt. Col. Ariel Pico, ginpahayag sini nga may yara sang city ordinance sa ciudad sang Bacolod batok sa mga nagabayolar sang health protocols.
Suno kay Pico, naga-issue sila gilayon sang citation ticket batok sa mga nagalapas sa ordinansa.
Nagpang-abiso man ang tagpamaba sa mga sumilimba nga may yara sang immumo-defficiency, vulnerable nga mga tigulang kag kabataan nga indi nalang magpadulong sa simbahan kun mahimo agud malikaan nga malatnan sang balatian.
Nagpanugyan man ini sa mga ginikanan nga bantayan gid sang husto ang ila mga pamatan-on nga kabataan bangud madamo sa mga ini ang wala man naga-simba kag yara lang sa sagwa sang simbahan kag nagapakita lang sa ila mga abyan ukon mga nobya kag nobyo.
