Magadeploy subong nga adlaw sang dugang nga crowd control personnel ang Bacolod City Police Office para sa ulihi nga adlaw sang filing sang Certificate of Candidacy para sa 2025 Midterm Elections.
Sa interview sang Bombo Radyo Bacolod kay Police Col. Joeresty Coronica, City Director sang Bacolod City Police Office, nangin matawhay kag wala ini sang nabaton nga report nga may nagluntad nga wala ginalauman nga mga insidente sa sulod sang pito ka adlaw sang COC filing sa ciudad sang Bacolod.
Suno kay Coronica, subong nga adlaw, ulihi nga adlaw sang COC filing kag ginalauman ang pagdinaguso sang mga political aspirants ilabi na ang may kaupod nga supporters gani nagdeploy sila sang dugang nga crowd control personnel.
Nagpanugyan man ini sa mga supporters nga ipabilin nga malinong kag matawhay ang pagpatigayon sang COC filing kag likawan ang magtuga sang gamo.
Samtang ang mga kapulisan pagkatapos sang COC filing magabantay naman sila para sa seguridad sang Masskara Festival.
Nagrequest ang mga ini sang augmentation force nagikan sa Police Regional Office 6 kun sa diin 980 ang ipadala kag natalana nga magaabot ang first batch nga ginabug-usan sang 500 plus nga mga kapulisan sa Oktubre 10 samtang ang nabilin ang magaabot sa Oktubre 20.
Suno kay Coronica, ang 980 nga augmentation halin sa region ang bastante na basta ang tanan ang nagatrabaho lamang.
