Magadeploy sang personnel ang Bacolod City Police Office (BCPO) duha ka adlaw kag matapos ang gintalana nga closure sa mga sementeryo sa syudad humalin Octobre 30 tubtob Nobyembre 2.
Madumduman nga nagpanaog na sang Executive Order No. 50 si Bacolod City Mayor Evelio “Bing” Leonardia sadtong Oktobre 17, nga nagamando sang temporaryo nga pagsarado sa mga sementeryo sa syudad sa tion sang piesta minatay.
Suno kay BCPO Director P/Col. Thomas Joseph Martir, bilang kabahin sang security plan sang syudad, magadeploy ini sang mga kapulisan indi lang mismo sa petsa nga may temporary closure sa mag sementeryo kundi kasubong man antes kag matapos ini.
Paathag sang City Director nga Octobre 27 palang magadeploy na ang mga ini sang personnel agud maseguro ang kahilwayan sa tion nga magdugok ang mga tawo agud makabisita sa nagtaliwan nga himata antes paman ang pagsarado.
Pasalig naman sini nga pahanugutan gihapon ang may schedule sang lubong sa Octobre 30 tubtob Nobyembre 2, kun sa diin 30 porsyento lang ang ginapahanugutan sa pagtambong.
Estrikto naman nga ipatuman ang minimum health standard and protocols kag ang magabayolar ang paga-issuehan sang citation tickets.
Kasubong man ang pagpatuman sang curfew kun sa diin wala na ginapahanugutan ang mag-iovernight sa sementeryo.
Ginadumilian man ang pagdala sang matalom nga bagay, gambling materials kag makahulubog nga ilimnon sa sulod sang sementeryo.
Magatukod man ang mga kapulisan sang Police Assistance desk kag Police Visibility Patrol.
Panugyan sini sa mga luyag magbisita sa sementeryo antes pa ang closure nga sundon ang EO 50,kag pagaseguruhon naman sang mga ini ang kahilwayan sang mga magabisita sa sementeryo.
