Bacolod City Police Office, magahatag sang rewards sa makatudlo ukon makadakop sa mga nagapatigayon sang vandalism

Wala pa sang nasampolan sumugod ang ginpatukod ang Task Force Vandalism sang Bacolod City Police Office.

Sa interview sang Bombo Radyo Bacolod kay Police Lt. Col Ronnie Brillo, pinuno sa Bacolod City Mobile Force Company, ginpatukod ni BCPO Director Police Col. Noel Aliño ang Task Force Vandalism sang Abril 3 kun sa diin nakapatigayon naman sang briefing sa mga Station Commanders upon sa ila intelligence officers sa kun paano ini ipatuman.

May-ara naman sila ang mga kabataan nga naaktuhan nga nagapatigayon sang vandalism apang ang mga ini ang temporaryo nga ginwarningan lamang.

Apang sa tion nga sila ang magaliwat sa indi husto nga buluhaton, ginapahayag nga ang ila nga mga ginikanan ang magapangatubang sang penalidad.

Ang mga madakpan ang may penalidad nga P3,000 sa first offense kag mas mataas sa 2^nd ukon 3^rd offense santo sa City Ordinance batok sa vandalism.

Magluwas diri, mahimo man nga mapriso ang magapatigayon sang vandalism sa idalum sang Republic Act 3042 ukon Anti- Vandalism Act of 2009.

Suno kay Brillo, ang sin-o man nga makareport, makatudlo ukon makadakop sang mga nagapatigayon sang vandalism, ang hatagan sang cash reward kun sa diin, Si BCPO Director Aliño ang nagcommit sang P1,000 nga reward.

Sa pihak nga bahin, nagkoordinar man sila sa LGBTQ+ FOR PEACE AND ORDER ukon B-PLUS sa pagtumod sa mga lugar nga may vandals kag sila amo ang magatinlo kag magapinta sa mga ginvandalize nga propedad sang gobyerno.

Sa pihak nga bahin, ang mga Barangay ang nagaplano naman nga magtukod sang freedom wall kun sa diin pwede nga mapautwas sang mga pamatan-on ang ila ginabatyag kag indi na magpatigayon pa sang vandalism.