May yara sang ideploy nga personnel ang Bacolod City Police Office agud nga magsiguro sang kalinong kag katawhay sa filing sang certificate of candidacy para sa 2025 midterm elections.
Sa interview sang Bombo Radyo Bacolod kay Police Col. Joeresty Coronica, may yara sang deployment apang magaestoryahanay pa sila ni Bacolod City Election Officer Atty. Revo Sorbito angot diri.
Suno kay Coronica, may yara na sila sang nauna nga naestoryahan sang COMELEC nga ang lugar nga patigayunan sang filing sang Certificate of Candidacy ang sa second floor sang National Press Club.
Suno diri, may yara sang igadeploy nga mga kapulisan agud nga magbantay kag magpabilin sang kalinong kag katawhay.
Ginpahayag sini nga indi man kandidato ang nagapagamo kundi ang mga supporters.
Suno sa city director, wala pa sila sang nabaton nga impormasyon nga may yara sang mga supporters nga magapatigayon sang pagmartsa halin sa simbahan padulong sa lugar nga pagafilan sang COC.
Apang panugyan sini sa mga imbulbado nga partido nga magcoordinate sa mga kapulisan kag Bacolod Traffice Authority Office ukon BTAO agud sila ang maassists.
Nagpanugyan man si Coronica sa mga supporters sang mga kandidato sa maabot nga piniliay sa 2025 nga indi na paggamuhon ang piniliay bangud ang “Voice of the People is the voice of God.”
