Nagaplano ang Bacolod City Police Office nga magtukod sang task group nga magaimbestigar sa mga tawo nga yara sa likod sang mga bangkay nga ginbilin sa tamburong sa nagkalain-lain nga bahin sang ciudad.
Ini ang kasunod sang pagkasapo sang nagakaagnas nga bangkay sang tawo sa sulod sang tamburong sa Barangay Felisa sang Domingo sang gab-i kag sa Barangay Cabug kahapon sang hapon.
Suno kay Police Major Nestor Bacuyag, acting spokesperson sang BCPO, ginarekomendar ang pagtukod sang task group bangud may criteria para diri kag may period nga kinahanglan ini nga masolbar nga amo ang anom ka bulan.
Sa karon, nagacoordinate sila sa Negros Occidental Police Provincial Office angot sa tatlo ka mga lalaki nga namissing nga ginalakipan sang mag-abyan sa banwa sang La Castellana kag ang taga-Silay nga wala sang unto.
Maayo naman nga patimaan bangud nagpadulong sa BCPO ang pamilya sang lalaki nga taga-Silay bangud wala sang unto ang lalaki nga nasapwan sa Barangay Cabug nga anggid sa ginapangita nila nga himata.
Apang, indi pa makumpirmar ang identity tubtub nga matumod gid sang pamilya.
Magahingyo man sila sa pamilya nga magsumiter sang request para sa DNA test.
