Nagpanugyan ang tagpamaba sang Bacolod City Police Office (BCPO) nga maghalong ilabi na subong nga bulan sang Disyembre kun sa diin madata na ang pagpangawat kag mangin mahinalungon sa pagdala sang salakyan agud malikawan nga maaksidente sa dalanon.
Sa interview sang Bombo Radyo Bacolod kay Police Lt. Col. Ariel Pico, ginpahayag sini nga kadungan sang pagsulod sang bulan sang Disyembre, madamo ang mga ginahiwat nga Christmas Party kag madamo man ang mga nagapauli nga nakainum na gani madamo man sang mga nagaluntad nga traffic accident.
Suno kay Pico, kun nakainum ang tawo sang makahulog nga ilimnon, blurred na ang panan-awan bangud natuyo na kag indi na maayo ang decision making sang tawo nga yara sa idalom sang makahulubog nga ilimnon.
Mas maayo nga indi nalang magdrive kun hubog agud malikawan ang aksidente.
Samtang, nagpanugyan man ini nga kun ano ang mga bag o nga kagamitan indi pagpost sa social media agud indi matuipan sang mga kawatan.
Sa mga subdivision naman kinahanglan nga magtakod sang mga closed-circuit television (CCTV) kag iacctivate ang mga home owners association agud indi mabiktima sang mga kawatan.
Ginpahayag man ni Pico nga ang crime prevention ang indi lang dapat sa police kundi sa tawo man bangud may yara sang ginatawag nga citizens arrest kag mas matahap man ang mga nagahimo sang pagpangawat.
Suno kay Pico, dapat man siraduhan ang balay sa tion nga magtulog kag kudalan kun wala sang kudal.
Sarang man ang home owners association sang mga subdivision nga magpangayo sang bulig sa mga force multipliers bangud willing man ang mga ini nga magbantay sa subdivision.
Nagpanugyan man ini nga kun madakpan ang kawatan pasakaan sang kaso apisar nga ginbalik ang mga ginkawat nga items agud nga indi ma-anad sa paghimo sa krimen.
