Tinutuyo sang Bacolod City Police Office nga tultolon kag hibaluon ang mga indibidwal nga imbolbado, may kaangatan, kakunsabo, ukon ginakuhaan sang illegal nga druga nga ginadagdag sa ciudad sang Bacolod kasunod sa nagahilapit nga Masskara Festival 2023.
Sa interview sang Bombo Radyo kay Bacolod City Police Office Director Police Col Noel Alino, kasunod sa ila nga Anti Illegal Drug Campaign sa pagtutok sa supply sang illegal nga druga sa nagahilapit nga Masskara Festival ila ginatarget nga mahibaluan kun diin ginakuha ang supply sang illegal nga druga kag ang mga kakunsabo nga nagatransact sini para idagdag sa ciudad.
Dugang pa niya, bisan pa gutok ang trabaho sang kapulisan para sa Masskara kag nagahilapit nga Barangay and Sangguniang Kabataan Elections, padayon sa gihapon ang ila operation sa illegal drugs.
Kahapon, masobra P20.5 million nga balor sang suspected shabu ang narecover sa drug buybust operation nga ginpatigayon sa Purok Neptune, Barangay Singcang Airport, Bacolod City.
Ang suspetsado ang ginkilala nga si Jummel Camento alyas Tata, 38 anyos, single, wala sang trabaho kag residente sa nasambitan nga lugar.
Narecover sa paghinakop sini ang 15 ka sachet sang suspected shabu nga nagabug-at sang 3.20 kilograms kag may standard drug price nga P20,536,000 kag ginalantaw diri nga dako nga supply sang illegal nga droga ang natalana para sa highlight sang Masskara Festival 2023.
Suno kay Alino, gina-interogar pa sang intelligence unit si Camento sa pagkuha sang impormasyon sa ginakuhaan sini sang supply kag identity sang mga kakunsabo sini.
Apang sa inisyal nga impormasyon may koneksyon si Camento sa aktibo nga Caunda Drug Group.
