Nagpasalig ang Bacolod City Police Office nga indi sila mag-untat sa pag-implementar sang mga ordinansa nga ginapatuman sang ciudad kag naghingyo sa mga pumuluyo nga sundon ang mga mando para sa ikaayo sang tanan batok sa COVID-19.
Sang Domingo, nagpagwa si Mayor Evelio Leonardia sang Executive Order (EO) No. 31 Series of 2021 nga nagamando sang pagpatigayon sang mas istrikto nga precautionary measures agud mapunggan ang liwat nga nagasaka nga kaso sang (Covid-19) infections sa syudad.
Nakasaad diri ang pagpalawig sang curfew hours nga magaumpisa alas 10:00 sa gab-i tubtob alas 04:00 sa kaagahon nga nagsugod kagab-i kag magapatuman man sang liquor ban.
Sa interview sang Bombo Radyo kay BCPO Spokesperson Police Major Sherlock Gabana, hugot nga igaimplementar sang mga kapulisan subong man sang Mobile Patrol Unit kag Bacolod City Mobile Force Company ang nasambit nga mga direktiba kag magalibot man ang mag operatives sang kada unit agud lantawon ang mga business establishments.
Gindugang man sini nga halin sang una, nagaimplementar gid sila sang curfew kag sa karun naga-adjust lang sang oras.
Suno sa iya, ang mga wala nagasunod sa protocols ang paga-arestuhon kag pasakaan sang kaso.
Magadepende man kun ila issuehan sang citation ticket ang mga madakpan nga persona nga nagalapas sa ordinansa apang kun indi gid ang mga ini magpati sa mga pulis, pagapasakaan sila sang kaso nga disobedience to persons in authority.
Nagpangabay man ini sa mga pumuluyo sang gamay nga pasensya para sa kaluwasan sang tanan agud matapos na ang pandemic.
