Nagpatigayon sang simulation exercise ang Bacolod City Police Office (BCPO) angot sa Bank Robbery sa isa ka financial establishment sa Araneta Street, Bacolod City.
Ginkakibot sang pila ka mga motorista kag riding public kaina sang aga ang madamo nga mga kapulisan, nga armado kag nakapalibot sa isa ka financial corporation.
Sa interview sang Bombo Radyo Bacolod kay BCPO deputy city director for operation Police Lt. Col. Lester Leada, sa instruction ni BCPO Director Police Col. Joeresty Coronica, ginapapreparar ang mga kapulisan kasubong man ang mga financial establishment sa mga dapat himuon sa tion sang kaangay nga hitabo.
Gindeploy sang BCPO ang Special Weapons and Tactics (SWAT) team, Mobile Force Battalion kag mga personnel sang Bacolod City Police Station 1.
Ang simulation ang agud mahanas ang mga kapulisan kag mahibaluan ang ila mangin role sa tion ang bank robberies.
Sa ila scenario, may-ara pa sang shoot-out gani pinaagi sa Bacolod Traffic Authority Office, ginreroute sa lain nga dalan ang iban nga motorista agud maseguro nga indi masalabat sang bala, agud mapaanggid gid sa orihinal nga scenario ang operasyon.
Nahimo nga ma-aprehend ang duha ka ginpa-akto nga suspect nga nagsulod sa financial firm pinaagi sa atup sa likod nga bahin sang building, apang may duha ka iban pa nga nakapalagyo.
Ang nakapalagyo ang nadakpan naman sang Bacolod Police Station 3 sa ila area of responsibility paagi sa dragnet operation.
Nagdeploy man sang apat ka fire truck ang Bacolod City Fire Station kasubong man ambulansya, bangod sa ila scenario may-ara sang sunog.
Paathag ni Leada nga ginalibot nila ang tagsa ka PNP units sa pagpatigayon sang simulation exercise agud nga tanan nga police personnel ang preparado pananglitan may kaangay nga robbery on progress nga matabo sa ciudad sang Bacolod.
