Nagtukod na ang Bacolod City Police Office sang tracker team agud nga madakpan ang mga nagahimo sang krimen sa ciudad ilabi na ang mga kawatan.
Nahibaluan nga nagdata sa karon ang kinawatay kag robbery sa Bacolod kun sa diin nagapanulod-sulod sa mga balay ang mga suspetsado samtang ang iban naman ang nagapang-agaw sang cellphone.
Suno kay BCPO city director Police Col. Noel Aliño, may menor de edad nga nadakpan nga nagapangawat kag may isa naman ka balay nga ginsulod sang Oktubre 2.
Ginwarningan ni Aliño ang mga kawatan kag nagsungka na ang duha ka menor de edad nga nagtuyo nga mangawat sa Barangay Sum-ag bangud nagviral ang iya itsura nga nakuha sang CCTV camera.
Aminado si Aliño nga sa social media ginapost ang natabo kag wala ginadiretso sa police station gani ulihi na ini mahibaluan sang mga pulis.
Bangud sini, nagpanawagan ang city director sa mga pumuluyo nga isugid gilayon sa mga pulis agud nga sila ang makaresponde bangud may mga checkpoint sa karon nga ginapatigayon may kaangtanan sa election gun ban.
Suno sa iya, kanugon sang oras nga makaresponde pa kuntani ang mga pulis bangud wala nagapahibalo ang mga pumuluyo.
Kaina sang aga, nagpatigayon ang BCPO sang simulation exercises on high risk incidents angot sa MassKara Festival kag Barangay and Sangguniang Kabataan elections.
Suno kay Aliño, ginatakos sa karon ang kahandaan sang mga pulis sa Bacolod bangud duha ang ila nga bantayan – ang MassKara Festival kag ang nagahilapit nga eleksyon.
Suno sa BCPO director, indi nila luyag nga hambalon sang mga pumuluyo nga indi sila makahibalo kun ano ang himuon gani kinahanglan gid nga ila maeksperyensyahan ang scenario.
Suno diri, ang ila ginhimo ang para sa emergency response and preparedness sang BCPO bangud ang pagsalbar sang kabuhi ang dapat unahon apang kun krimen na ang ginhimo, mangin lain naman ang konsiderasyon sang mga pulis.
Suno kay Aliño, magamit nila ang training, may festival man ukon wala.
Suno naman kay Police Capt. Paul Vincent Pendon, deputy for operation sang Bacolod City Mobile Force Company, ginpatigayon ang simulation exercises agud mapakita kun ano kahanda ang mga pulis sa dako nga aktibidad.
Ini ang gin-updan sang tanan nga law enforcers nga nagaresponde sa tion nga may dako nga insidente.
Ginpasiguro naman sang Bacolod City Mobile Force Company nga handa na sila para sa nagahilapit nga kahiwatan.
Subong nga nagadata ang kinawatay sa ciudad, ginpasiguro ni Pendon nga ara lang sila nga handa agud nga mag-augment sa mga police stations, kadungan sang panawagan sa mga pumuluyo nga ireport ini gilayon sa mga pulis.
