Nag-upod ang Bacolod City Police Office (BCPO) sa ginpatigayon nga kick off sang Brigada Eskwela kahapon, Agosto 1.
Sa interview sang Bombo Radyo Bacolod kay Police Lt. Col. Sherlock Gabana, spokesperson sang BCPO, ang mga kapulisan sa Bacolod City ang nagpakigbahin sa ginpatigayon nga Brigada Eskwela sa ila nga designated nga lugar.
Suno kay Gabana, magluwas sa mga kapulisan nga yara sa mga police stations sa syudad nakigbahin man ang mga naassign nga mga kapulisan sa BCPO, mobile force company kag mga force multipliers nga ginabug-usan sang Barangay Tanod kag Barangay Peacekeeping Action Teams (BPATs).
Ang mga police ang nagbulig sa mga eskwelahan sa ila area of assignments sa pagpaninlo, repairs kag paminta sang mga eskwelahan agud nga magamit sang mga manunudlo kag mga estudyante.
Nagpanugyan man si Gabana sa mga ginikanan nga bantayan ang mga kabataan kag indi pagbay-an sa una nga semana sang klase apisar nga nakahibalo na ang mga ini nga magpadulong sa mga eskwelahan nga isahanon.
Dugang pa sini ang mga kabataan ang indi pagpabitbiton sang mga malahalon nga mga kagamitan agud nga indi na magbiktima sa malain nga tinutuyo.
